[含劇情]

杜琪峰好似好喜同人鬧交，咁我又想同佢講今次《以和為貴》真係拍得麻麻，同上集簡直兩個層次。

上集借幫會選辦事人，講選舉制、講權力平衡、講社團文化。兩位大佬響監獄遙距奪棍，班契仔打生打死爭餐懵，拍得好有逼力。加埋梁家輝狂放外露演出，好睇。但去到續集《以和為貴》有乜？講黑社會何去何從，講人在江湖身不由己。結局畫公仔畫出腸，真係用把口講到出面，連隱喻都費事玩，好得人驚。班契仔更慘，以為今集位位獨當一面，有得大展拳腳，點知好戲果四位全部靠邊站，林雪同張兆輝直頭淪為阿四。開頭有骨氣契爺契仔食飯一幕最好睇，成個格局山雨欲來風滿樓咁款，尤其林家棟，一開口就單刀直入，爽；可惜有頭威冇尾陣，釣完魚之後就幾乎人間蒸發，最後甚至攪到要避警車(上集都撞死差佬啦，幾…幾勁呀!!!)，餘下時間幾乎全程要對住個悶不堪言o既古天樂，睇佢點樣「膽大手黑」。
但人肉餵狗、訓棺材、鄧伯碌樓梯，都不過係純官能刺激，完全不值得媒體去大書特書，變做成套戲o既焦點。所以今集《以和為貴》雖然承先，但未能啟後，杜琪峰問黑社會何去何從？我想問佢究竟想點？

我知有好一段時間，韋家輝於銀河映像係專責文膽角色，負責度橋獻計寫劇本(《嚦咕嚦咕新年財》d牌局全部都係出自其腦)；杜琪峰則精於落場指揮，撚場面有一手，所以兩個合作通常都有化學作用，溝到d野出黎。但若然分家，韋家輝明顯做唔掂導演，杜sir d劇本亦明顯弱好多，但勝在場面搭救，故事薄弱如《鎗火》同《PTU》都俾佢拍到好好睇睇，而且非常精於表現男人之間果種無聲勝有聲，「唔駛講野」o既情誼。

所以我懷疑，當《黑社會》已經講盡想講說話，去到《以和為貴》連忠肝義膽如師爺蘇、大頭同飛機都冇位企o既時候，杜琪峰就只能繼續於棺材、釣魚、餵狗上撚其場面，然後於結局為「黑社會何去何從？」提供一個直接到爆o既model answer。

失望。