我與很多朋友每時每刻的「簡便占卜法」：出門咁岩有lift、落街咁岩有車、買野毋須排隊，摩西分紅海一樣，是日必定大吉大利，順風順水，如有神助。相反，搭lift層層停，落到車站內心默數十秒仲未有車黎，上到車司機又逢黃燈必停，是日唔駛問阿貴肯定諸事不順，衰到貼地，霉過梅菜。

零六年第一日，決定安坐家中平靜渡過，豈料割掣台忽然屎忽痕重播外語殘片《綠野仙蹤》，畫面靚絕，看得人滿心歡喜，直有「執到筍野」之感。這套一九三九年的電影，印像中孩童時期「麗的電視」經常重播(而印像中串爆譚炳門當然有份配音)，但那個年紀懂個屁甚麼art direction，如果無配音甚至連讀字幕都有困難呢！今日再看，感受當然大大不同，去到 Munchkin Land 那幕我便幾乎開心到大叫 — 乜咁鬼Willy Wonka?! 一大班矮人載歌載舞，件件戲服都精心打造，連hair style都各自各精彩，絕非一個模duplicate一百個copy出來了事，看得出花了十幾廿擔心機，晚晚O.T，還有那條黃磚路、鑽石紅鞋和變色馬(隻馬俾人咁染法唔知有乜感受呢?)，camp到爆!! 一直覺得一個畫面要包羅紅黃藍綠好難做得好睇，一個失手便好容易變成《整古專家》或《我要做model》(不過王晶電影那種不專業的美指差到一個地步其實又有另一種趣味，最悶反而是執到四四正正那類，這是題外話)，艾慕杜華鏡頭下的紅男綠女配視覺上的大紅大藍還勝在有感情承托，但單靠art direct去左披右搭做出趣味就更考功力，看得出《綠野仙蹤》的美指絕非撞手神靠好彩，幕幕諗過度過，每格菲林都可以放做poster，舉例多樂菲邂逅大鐵人一幕，墨綠底配粉藍鐵灰，女孩手中忽然多個紅蘋果掩掩揚揚，非常醒目，因為與劇情無關，所以我信是美指而非導演的主意，而且好喜那種手畫的山水畫佈景板，每個scene基本上就是一條黃磚路通向佈景板，四個半人獸朝佈景板彈彈跳跳然後鏡頭一轉就已經去到下一個stage，好有舞台劇的效果。擅於黑色美學的Tim Burton在《朱獎人》忽然大玩五光十色，我認為向《綠野仙蹤》偷師的嫌疑實在不少。

零六第一套電影有如此意外收鑊，實在是好兆頭!!


一路睇一路諗有冇fashion designer肯搵季用《The Wizard of Oz》做theme?唔憂唔夠reference。COMME des GARCONS早一/兩季都有出過一對類似既紅鞋，配一雙美腿的話其實都幾富挑逗性，成日覺得童話故事硬係有好多hidden左既咸濕元素…


早三四十年前d電影海報無論layout同typo都好大膽，composition癲到嚇你一跳，《The Wizard of Oz》仲要係七十幾年前既戲，相比之下家下既電影海報就design得越黎越保守，唔信去quicktime個網睇下d 不日上映既thumbnail，包你訓著…zzzZZZzzz…